🔴 بعض النصائح حول تنظيم الوقت : - أولا حاجة أنك تتعلم تقرا بالأهداف و ليس بالوقت : يعني أنت كي تجي تقرا تقول أنا ليوم نقرا درسين في العلوم و نكملهم أو نقرا درسين في الأدب و نكملهم ما تقولش انا نقرا ساعتين أدب و بعدها ساعتين اجتماعيات لأنك فعليا راح تشغل بالك بحساب الوقت ويكت يخلاص و تنسا أنك قعدت باش تقرا اصلا - ثاني حاجة لا تقيد نفسك ببرنامج معين لأنك مش راح تلتزم بيه مطولا ... صح تلتزم يوم يومين و مبعد تتبعثر و تتخلط عليك الأفكار اذن من الأحسن تنظم روحك كل يوم على حدى ...قال اليوم نضت باكرا دير خطة لليوم هذاك برك و امشي عليها و كل يوم بخطة مختلفة باش ما تكرهش حتى تلقا روحك مشيت بوتيرة منتظمة أما البرنامج المطول يزيد عليك الفوضى فقط - ثالث حاجة باش تكون انتاجي في يومك لازم تنوض بكري و تبدا نهارك بصلاة الفجر و قراءة ما تيسر من القرآن و تكرار سورة الشرح باش ربي يشرحلك صدرك و يعطيك القدرة الكافية باش تكمل هذا اليوم -رابع حاجة و لي هي الأهم و لي لازم تذكر أولا : الصلاة في وقتها ... فيها بركة عظيمة لا تؤجل صلاتك كل ما صليت في الوقت و دعيت ربي من قلبك عمرو ما يخيبك راح تلقا نفسك مطمئن البال و نهارك يتنظم وحدو وحدو ان شاء الله يفيدوكم هذو النصائح و الباقي انشره لاحقا باش ما يكونش المنشور طويل 😊 شاركو المنشور فضلا 🤗